IMO അടക്കം 14 ആപ്പുകൾ നിരോധിച്ച് കേന്ദ്രം

 

മലയാളികൾ അടക്കം ലോകത്ത് ലക്ഷകണക്കിന് ആളുകൾ ഉപയോഗിച്ച് വരുന്ന വീഡിയോ കോളിഗ് ആപ്പായ IMO യ്ക്കും ഇന്ത്യയിൽ പൂട്ടുവീണു.

പാകിസ്താൻ തീവ്രവാദികളടക്കം ആശയവിനിമയത്തിന് വൻതോതിൽ ഉപയോഗിക്കുന്നുവെന്ന റിപ്പോർട്ടുകളെ തുടർന്ന് 14 ആപ്പുകളാണ് കേന്ദ്രം ബ്ലാക്ക് ലിസ്റ്റ് ചെയ്തത്. ഈ ആപ്പുകൾക്ക് ഇനി മുതൽ ഇന്ത്യയിൽ പ്രവർത്തനാനുമതി ഉണ്ടാകില്ല. അതിനാൽ തന്നെ ഗൂഗിൾ പ്ലേ സ്‌റ്റോറിൽ നിന്നും, ആപ്പിൾ ആപ്പ് സ്‌റ്റോറിൽ നിന്നും ഈ ആപ്പുകൾ അപ്രത്യക്ഷമാകും.
ഭീകരവാദ പ്രവർത്തനങ്ങൾക്കെതിരെയുള്ള ശക്തമായ നടപടിയുടെ ഭാഗമായാണ് കേന്ദ്രത്തിന്റെ അടുത്തഘട്ട ആപ്പ് നിരോധനം. തീവ്രവാദ സംഘടനങ്ങൾ, തങ്ങളുടെ പിന്തുണക്കാരുമായും ഓവർ ഗ്രൗണ്ട് വർക്കർമാരുമായും (OGW) ആശയവിനിമയം നടത്താൻ ഇപ്പോൾ നിരോധിച്ച ഈ ആപ്പുകൾ ഉപയോഗിച്ചിരുന്നുവെന്നാണ് വിലയിരുത്തൽ. നിരോധിക്കപ്പെട്ട ആപ്പുകളുടെ പേരുകളാണ് താഴെയുള്ളത്. ഇതിൽ പ്രധാനം വിഡിയോ കോളിംഗ് ആപ്പായ ഐഎംഒ തന്നെയാണ്.
1. കിപ്വൈസർ (Crypviser)
2. എനിഗ്മ (Enigma)
3. സേഫ്സ്വിസ് (Safeswiss)
4. വിക്രം (Wickrme)
5. മീഡിയഫയർ (Mediafire)
6. ബ്രയാർ (Briar)
7. ബിചാറ്റ് (BChat)
8. നാൻഡ്ബോക്സ് (Nandbox)
9. കോൺയോൺ (Conion)
10. ഐഎംഒ (IMO)
11. എലമെന്റ് (Element)
12. സെക്കൻഡ് ലൈൻ (Second Line)
13. സാംഗി (Zangi)
14. ത്രീമ (Threema)
സുരക്ഷാ, രഹസ്യാന്വേഷണ ഏജൻസികളുടെ നിർദേശത്തെ തുടർന്നാണ് കേന്ദ്രത്തിന്റെ നടപടി. ഇതുവരെ കേന്ദ്രം 250 ഓളം ചൈനീസ് ആപ്പുകൾ ഇന്ത്യയിൽ നിരോധിച്ചിട്ടുണ്ട്. രാജ്യസുരക്ഷയ്ക്ക് ഭീഷണിയുയർത്തുന്ന, ഇന്ത്യൻ നിയമങ്ങൾ പാലിക്കാത്ത ആപ്പുകളുടെ ലിസ്റ്റ് തയ്യാറാക്കിയാണ് കേന്ദ്രത്തിന്റെ നീക്കം. 2000- ലെ ഇൻഫർമേഷൻ ടെക്നോളജി ആക്ട് സെക്ഷൻ 69 എ പ്രകാരമാണ് ആപ്പുകൾ വിലക്കിയിട്ടുള്ളത്. നിരവധി ആപ്പുകൾ കേന്ദ്രത്തിന്റെ നിരീക്ഷണത്തിലാണെന്നും കൂടുതൽ വിലക്കുകൾ ഉടൻ ഉണ്ടായേക്കുമെന്നും റിപ്പോർട്ടുകളുണ്ട്.

കേന്ദ്രഭരണ പ്രദേശമായ ജമ്മു കശ്മീരിലെ ഓവർഗ്രൗണ്ട് തൊഴിലാളികൾക്കും മറ്റ് പ്രവർത്തകർക്കും കോഡ് ചെയ്ത സന്ദേശങ്ങൾ അയയ്ക്കാൻ പാകിസ്ഥാനിലെ തീവ്രവാദികൾ ഈ ആപ്ലിക്കേഷനുകൾ ഉപയോഗിച്ചുവെന്ന് റിപ്പോർട്ടുകളുണ്ട്. 2020 ജൂൺ മുതൽ TikTok, Shareit, WeChat, Helo, Likee, UC News, Bigo Live, UC Browser, Xender, Camscanner, PUBG Mobile, Garena Free Fire തുടങ്ങിയ ജനപ്രിയ മൊബൈൽ ആപ്പുകൾ സർക്കാർ മുമ്പ് നിരോധിച്ചവയിൽ ഉൾപ്പെടുന്നു.