പോക്കോ M4 പ്രോ 5ജി ഇന്ത്യയിലേക്ക്

 

ഷഓമിയുടെ ഉടമസ്ഥതയിലുള്ള സ്മാർട്ട്ഫോൺ ബ്രാൻഡായ പോക്കോ  ഇന്ത്യൻ പുത്തൻ സ്മാർട്ട്ഫോൺ അവതരിപ്പിക്കാനൊരുങ്ങുന്നു. പോക്കോ M4 പ്രോ 5ജിയാണ് ഉടൻ ഇന്ത്യയിലെത്തുക.

ആഗോള വിപണിയിൽ കഴിഞ്ഞ വർഷം നവംബറിലാണ് പോക്കോ M4 പ്രോ 5ജി അരങ്ങേറ്റം കുറിച്ചത്. ഒക്ടോബറിൽ ചൈനീസ് വിപണിയിലെത്തിയ റെഡ്മി നോട്ട് 11 5ജിയുടെ റീബ്രാൻഡഡ്‌ പതിപ്പാണ് പോക്കോ M4 പ്രോ 5ജി.

4 ജിബി റാം + 64 ജിബി സ്റ്റോറേജ് വേരിയന്റിന് 229 യൂറോ (ഏകദേശം 19,500 രൂപ), 6 ജിബി റാം + 128 ജിബി സ്റ്റോറേജ് പതിപ്പിന് 249 യൂറോ (ഏകദേശം 21,200 രൂപ) എന്നിങ്ങനെയാണ് യൂറോപ്യൻ വിപണിയിൽ പോക്കോ M4 പ്രോ 5ജിയുടെ വിലകൾ. കൂൾ ബ്ലൂ, പോക്കോ യെല്ലോ, പവർ ബ്ലാക്ക് എന്നീ നിറങ്ങളിലാണ് യൂറോപ്യൻ വിപണിയിൽ പോക്കോ M4 പ്രോ 5ജി അവതരിപ്പിച്ചിരിക്കുന്നത്. ഇതേ നിറങ്ങളിലാവും ഇന്ത്യൻ വിപണിയിലും ഹാൻഡ്സെറ്റ് വില്പനക്കെത്തുക എന്നാണ് പ്രതീക്ഷിക്കുന്നത്.

ആൻഡ്രോയിഡ് 11-ൽ അടിസ്ഥാനമായ MIUI 12.5 സ്കിന്നിൽ പ്രവർത്തിക്കുന്ന പോക്കോ M4 പ്രോ 5ജിയ്ക്ക് 90Hz റിഫ്രഷ് റേറ്റുള്ള, 6.6 ഇഞ്ച് ഫുൾ-എച്ച്ഡി ഡോട്ട് ഡിസ്‌പ്ലേയാണ്. മീഡിയടെക് ഡൈമൻസിറ്റി 810 SoC പ്രോസസറാണ് പോക്കോ M4 പ്രോ 5ജിയുടെ ശക്തി. ഇന്ത്യയിൽ യൂറോപ്യൻ വിപണിയിൽ അവതരിപ്പിച്ച അതെ റാം, സ്റ്റോറേജ് കോമ്പിനേഷനിൽ തന്നെ പോക്കോ M4 പ്രോ 5ജി വില്പനക്കെത്തുമോ എന്ന് വ്യക്തമല്ല.

50 മെഗാപിക്‌സൽ പ്രധാന ക്യാമറയും 119 ഡിഗ്രി ലെൻസുള്ള 8 മെഗാപിക്‌സൽ സെക്കൻഡറി സെൻസറും ചേർന്ന ഡ്യുവൽ റിയർ ക്യാമറയാണ് പോക്കോ M4 പ്രോ 5ജിയിൽ ക്രമീകരിച്ചിരിക്കുന്നത്. മുൻവശത്ത്, 16 മെഗാപിക്സൽ സെൽഫി ക്യാമെറയണ്. 3.5 എംഎം ഓഡിയോ ജാക്കും യുഎസ്ബി ടൈപ്പ്-സി പോർട്ടും കണക്ടിവിറ്റിക്കായി ക്രമീകരിച്ചിട്ടുണ്ട്. 33W പ്രോ ഫാസ്റ്റ് ചാർജിംഗുള്ള 5,000 എംഎഎച്ച് ബാറ്ററിയാണ് സ്മാർട്ട്‌ഫോണിൽ പായ്ക്ക് ചെയ്യുന്നത്.