ഗൂഗിളിന് ഇന്ന് 21-ാം പിറന്നാള്‍
സംശയങ്ങളും ചോദ്യങ്ങളും ഗൂഗിളില്‍ തിരയുകയെന്ന ശീലം നമുക്ക് തുടങ്ങിയിട്ട് ഇന്നേക്ക് 21 വർഷങ്ങളായി. ഗൂഗിളിന് ഇന്ന് 21-ാം പിറന്നാള്‍. ഇന്റർനെറ്റ് സെർച്ചിങ്ങിന് പുതിയ അർത്ഥങ്ങൾ നൽകിയ ഗൂഗിൾ പ്രത്യേകം തയ്യാറാക്കിയ ഡൂഡില്‍ ആര്‍ട്ടിലൂടെയാണ് ജന്മദിനം ആഘോഷിക്കുന്നത്. ബോക്സ് കമ്പ്യൂട്ടറില്‍ ഗൂഗിളിന്റെ ബ്രൗസറുള്ള ചിത്രമാണ് ഗൂഗിള്‍ ജന്മദിനത്തില്‍ ഒരുക്കിയിരിക്കുന്നത്. 27-9-98 എന്ന തീയതിയും ഇതില്‍ അടയാളപ്പെടുത്തിയിട്ടുണ്ട്.
1988 -ലാണ് കാലിഫോര്‍ണിയയിലെ സ്റ്റാന്‍ഫോര്‍ഡ് സര്‍വ്വകലാശാലയിലെ ഗവേഷക വിദ്യാര്‍ത്ഥികളായ സെര്‍ജി ബ്രിനും ലാറി പേജും ഗൂഗിളിന് രൂപം നല്‍കുന്നത്. ഒരു സുഹൃത്തിന്റെ ഗാരേജിലായിരുന്നു തുടക്കം. വെറും വെബ് സെർച്ച് എൻ‌ജിൻ മാത്രമായി പ്രവർത്തനം ആരംഭിച്ച ഗൂഗിൾ പിന്നീട് ചിത്രങ്ങൾ സൂക്ഷിക്കാനും എഡിറ്റിങ്ങിനുമുളള സംവിധാനം, വാർത്തകൾ, വിഡിയോ, മാപ്പുകൾ, ഓൺലൈൻ വ്യാപാരം, ഓൺലൈൻ സംവാദം എന്നിങ്ങനെ ഇന്റർനെറ്റിന്റെ സർവ മേഖലകളിലും തങ്ങളുടെ സേവനങ്ങൾ വ്യാപിപ്പിച്ചു.
1999 സെപ്റ്റംബര്‍ 21 വരെ ഗൂഗിള്‍ സെര്‍ച്ച് ബീറ്റാ വെര്‍ഷനിലായിരുന്നു പ്രവര്‍ത്തിച്ചത്. ലളിതമായ രുപകല്‍പനയായിരുന്നു ഗൂഗിള്‍ സെര്‍ച്ച് എന്‍ജിന്റെ പ്രധാന ആകര്‍ഷണം. ഇതുകൊണ്ട് തന്നെ ഇന്റര്‍നെറ്റ് ഉപഭോക്താക്കളുടെ ഇടയില്‍ ഗൂഗിള്‍ പെട്ടെന്നു പ്രശസ്തമായി.
2000ല്‍ സെര്‍ച്ച് കീ വേര്‍ഡിനനുസരിച്ച് ഗൂഗിളില്‍ പരസ്യങ്ങള്‍ നല്‍കാന്‍ തുടങ്ങി. ഇതോടെ കമ്പനിയുടെ വരുമാനവും വർധിച്ചു. പിന്നീട് നടന്നത് ചരിത്രമാണ്. ഒട്ടേറെ സംരംഭങ്ങൾ പരാജയപ്പെട്ടപ്പോൾ വെറുമൊരു കാര്‍ഷെഡില്‍ നിന്നും പ്രവര്‍ത്തനം തുടങ്ങിയ ഗൂഗിള്‍ വെബ് ലോകത്ത് സെര്‍ച്ചിന്റെ കുലപതിയായിമാറുകയായിരുന്നു. ഇന്ന് ഇന്റര്‍നെറ്റ് സെര്‍ച്ച് എന്നതിന്റെ മറുവാക്കാണ് ഗൂഗിൾ എന്ന പേര്. യാഹൂ, എക്സൈറ് എന്നീ കമ്പനികളെയും ഇതിനിടയിൽ ഗൂഗിൾ മറികടന്നു.
ഗൂഗിൾ എന്ന പേര് സെർച്ച് എൻജിന് കിട്ടിയതിന് പിന്നിലും ഒരു കഥയുണ്ട്. അപ്രതീക്ഷിതമായ ഒരു അക്ഷരപ്പിശകിൽനിന്നും പിറവിയെടുത്തതാണ് ഗൂഗിൾ എന്ന പദം. ഒന്നിനു ശേഷം നൂറു പൂജ്യങ്ങൾ വരുന്ന സംഖ്യയെ സൂചിപ്പിക്കാൻ ഉപയോഗിക്കുന്ന ഗൂഗൾ (googol) എന്ന പദം സെർച്ച് എൻ‌ജിന്റെ പേരാക്കാനായിരുന്നു സെര്‍ജി ബ്രിനും ലാറി പേജും ആലോചിച്ചത്. അമേരിക്കൻ ഗണിത ശാസ്ത്രജ്ഞനായ എഡ്വേഡ് കാസ്നറുടെ അനന്തരവൻ ഒൻപതു വയസുകാരൻ മിൽട്ടൺ സൈറോറ്റയാണ് 1938ൽ ആദ്യമായി ഗൂഗൾ എന്ന പദം ഉപയോഗിച്ചത്. ഗണിത ശാസ്ത്രജ്ഞരുടെ ഇടയിൽ പ്രചരിച്ചിരുന്ന ഈ പദം തന്നെ തങ്ങളുടെ സെർച്ച് എൻ‌ജിനു പേരായി നൽകാം എന്നായിരുന്നു ഗൂഗിൾ സ്ഥാപകരുടെ ചിന്ത. എണ്ണിയാലൊടുങ്ങാത്ത വിവരങ്ങൾ ഈ സെർച്ച് എൻ‌ജിനിൽ ലഭ്യമാകും എന്ന സന്ദേശമായിരുന്നു അവർ നൽകാൻ ഉദ്ദേശിച്ചത്. എന്നാൽ അവർ എഴുതിയത് അക്ഷരപ്പിശകോടെയായെന്നു മാത്രം. അങ്ങനെ ഗൂഗളിനു പകരം പേര് ഗൂഗിൾ (google) ആയി മാറുകയായിരുന്നു.
അറിവുകൾ ശേഖരിച്ച് ഇത് സാർവ്വ ദേശീയമാക്കുക എന്നതാണ് ഗൂഗിളിന്റെ ലക്ഷ്യം. ഇരുപത് കോടിയില്‍പ്പരം സെര്‍ച്ചുകളാണ് പ്രതിദിനം ഗൂഗിളില്‍ നടക്കുന്നത്. ഇതൊക്കെയാണെങ്കിലും കമ്പനിക്ക് തന്നെ തന്റെ പിറന്നാളിന്റെ കാര്യത്തിൽ ചെറിയ സംശയമുണ്ട്. 2006 മുതലാണ് ഗൂഗിൾ സെപ്തംബർ 27 ജന്മദിനമായി ആഘോഷിച്ച് തുടങ്ങിയത്. അതിന് മുന്നേ സെപ്തംബർ 26 ആയിരുന്നു ഗൂഗിളിന്റെ ജന്മദിനമായി കണക്കാക്കിയിരുന്നത്. എന്നാൽ 2004 ൽ ഗൂഗിളിന്റെ പിറന്നാൾ സെപ്തംബർ 7 നും, അതിന് മുമ്പത്തെ വർഷം സെപ്തംബർ 8 നും ആയിരുന്നു.
%20(1).jpeg)
0 അഭിപ്രായങ്ങള്‍